جلالة الملك .. جدي العزيز

جيهان الغرباوي

يا حبيبي يا جدي .. قابلت وجه رب كريم ودخلت عالم الخلود السرمدي النوراني، وسبتني في الدنيا الفانية مع المرحلة الانتقالية و النفق المظلم ..

احسبك تعيش مع الملائكة في السماء .. وانا هنا بتبهدل مع ناس دهماء، لا أصل ولا فصل ولا شجرة عيلة ولا ليهم اي موقع من الاعراب.

تعالى يا جدي شوف اللي احنا فيه .. (مش هاتقدر تغمض عنيك ) ..

الانصاص قامت والقوالب نامت، واللي كانت امه عياشة عامل علينا باشا، شبعة من بعد جوعة وسبحان العاطي الوهاب بعد الشبشب والقبقاب، وخسيس قال للاصيل تعالى اشتغل عندنا خدام .. ضحك الاصيل وقال : دانا اطلع فوق جبل عالي .. وتاكلني الحدادي والغربان .. ولا يقولوش الاصيل اشتغل عند الخسيس خدام ....

خسارتك يا جدي العظيم .. مالحقتش اغاني شفيق جلال، ولا حضرت حرب العراق .. لا مشيت في ثورة، ولا ولا دريت بالربيع العربي، ولا نزلت ميدان التحرير ..

مسكين يا جدي .. لا شفت مشروع النهضة، ولا شاركت في تأسيسية الدستور .. ولا انتخبت ام ايمن، ولا سمعت خطب الدكتور مرسي ولا دخلت فيلم العيد ...

اتخطفت بدري .. الله يرحمك ويجعل مثواك الجنة ونعيمها ..

لو كانوا عملوا كلية الفنون الجميلة ايامك، كنت بقيت العميد بلا منازع.



ولو كنت دخلت الهندسة، كنت سبت لي شركة مقاولات قد الدنيا، وفلوس متلتلة، وكنت زماني دلوقت بنافس ممدوح حمزة، ومش بعيد كنت امول شباب 6 مارس!

يالله.. مفيش احسن من السيرة الحلوة، وانت سيرتك زي المسك في العالم كله، منين ما اروح ويعرفوا اني حفيدتك بيحترموني ويقدروني، ويبقوا عايزين يشيلوني من على الارض شيل ..

جدي العزيز .. كم انا فخورة بك ..

الناس كلها فكراك وانا لسة ع العهد ..

ما زلت اسكن في شارع العيلة القديم، حيث عشت انت وبنيت اهم مشاريعك وخصصت المكان المناسب لمدافن الاسرة الكريمة .

مازلت يا جدو اسكن في شارع الهرم، على مقربة شديدة من هرمك الكبير، المسمى باسمك، عنوانا لاحدى عجائب الدنيا السبع.

جدي خوفو الحبيب .. تعالى شوف اللي جرى لنا من بعدك ..

تعالى شوف الحوسة والخيبة القوية .. تخيل يا جدو عيلتنا اتفركشت واموالنا اتسرقت و اتهربت والظاهر اكل الفول سنين طويلة مع العيش المدعم والمياه الملوثة طمس اخر عرق للعبقرية في سلالتك المصرية.

جدي الخالد المهيب، ايها الغائب الحاضر، اعلم انك اقوى من حثالة القوم الذين يذكرونك بالشر، أويهددون بيتك و مقبرتك بالهدم.

لا تقلق يا حبيبي ، الصراصير قد تتسلق الجدران مرة لكن التاريخ لم يذكر ابدا انها تستطيع هدم قصر الملك!

بالمناسبة يا جدو الملك.. انا عارفة انك مهم وعندك علاقات وحبايبك كتير في العالم كله، ممكن تجيبلي شغلانة حلوة وتساعدني اسافر برة ؟!!!