ميدو يشكو مرتضى منصور للفيفا ويطالب بإيقافه مدى الحياة
فجر أحمد حسام "ميدو"، المدير الفني السابق لنادي الزمالك، مفاجأة من العيار الثقيل، عن رئيس النادي مرتضى منصور، في إطار الحرب الدائرة بينهما، خلال الفترة الحالية.
وقال ميدو في تصريحات تلفزيونية الاثنين "تقدمت بشكوى رسمية للاتحاد الدولي، لكرة القدم، فيفا، بلجنة القيم والمبادئ، من أجل إيقاف مرتضى منصور مدي الحياة".
وأضاف "فيفا يوقف أي شخص يزج بأحد عناصر اللعبة تحت أي مسمى له علاقة بالعنصرية، مدى الحياة، ومن يثبت أنه تطاول على أى شخص بمثل هذه الإيحاءات، يتم إيقافه عن العمل، وعن أي نشاط له علاقة بالرياضة".
وتابع "قلت للنائب العام في مصر، إن مرتضى اتهمني بالشذوذ، وأقول لنظام السيسي، إما أن تثبتوا للعالم أننا في دولة قانون، أو دولة بلطجة و قلة أدب، الراجل ده بيقل أدبه على مصر كلها، مفيش واحد في مصر إلا وشتمه وسبه، مرتضى بيحاول يشوه صورتي عشان مشتغلش في أي نادي، طب هتشوف يا مرتضى أنا هعمل إيه وهشتغل فين".
واستطرد ميدو "مرتضى منصور شايف إن مفيش حد في مصر مالي عينه، ولا قادر يسكته، بس أنا بقولك أنا قاعد في وشك، وهكمل المشوار، وهطلع عليك اللي عملته في الناس، الزند قالي أنا لا علاقه لي بمرتضى ، الناس مستنيه الحق والعدل والقانون يمشي، يا البلطجة تمشي، وأنا البلاغ بتاعي كبير، ومكمل للآخر".
وأردف "الناس في النادي خايفه من مرتضى، وشغالة والسكينة على رقبتها، وممكن يطلعوا في مظاهرة مرتضى يا مرتضى بنحبك يا مرتضى، ده معين جوز أخته في النادي، في اللجنة القانونية وبيديله 30 ألف جنيه".
وعن حازم أمام، قال ميدو "حازم إمام، طبيعته إنه مش بيحب الصدام، وعمري ماهقوله يدخل حرب مش بتاعته، ومرتضى قال عليه يا كلب، ولما الناس ثارت عليه رجع في كلامه وقال انتوا بتركبولي صوت، أكثر حاجه أثرت فيا، معايرة مرتضى لحازم إمام، بإنه عمل عزاء والده الراحل حمادة إمام ، وهو أصلاً مدفعش حاجة من جيبه، كله من فلوس النادي".
وعن مذبحة الدفاع الجوي، قال: "سببها نرجسية مرتضى، والفشل في الإدارة، لأنه قال إن الدخول مجاني، وبعد كده قال بتذاكر، وانا هوزعها بمزاجي، وطالع يقول للوايت نايتس مصيركو الحبس او الموت، الكلام ده لو اتعمل في إنجلترا كان اتحاسب".
وكشف أمير مرتضى منصور، نجل رئيس نادي الزمالك، والمسؤول عن ملف التعاقدات مع المدربين الأجانب، وآخرهم الأسكتلندي ماكليش، عن موقفه من تصريحات ميدو ضد والده أمس.
وقال أمير عبر صفحته الرسمية على موقع التواصل الاجتماعي فيس بوك "رغم حزني الشديد واحتراماً لجماهير نادي الزمالك، مش هرد على أي إساءة أو اتهام أو إهانة، وده مش ضعف، الحمد لله أقدر أرد في أي وقت، وبعتزر لكل البرامج اللي طلبت إني أكون ضيف علشان أرد لأن مصلحة النادي دلوقتي أهم من غضبي وحرقة دمي، وحقي في الرد، ولكني هسكت علشان مصلحة النادي، وعلشان محدش يشمت أو يتريق علينا".
وأضاف "هبذل أقصى جهدي، إني اقنع والدي إنه يسكت وميردش علشان خاطر الجمهور والفريق، لأن الفترة الجاية صعبة، الفريق هيبدأ أفريقيا وكأس مصر والدوري محتاج تركيز والمدير الفني محتاج دعم، ومساعدة ومساندة".
وتابع "أخيراً أقسم بالله، كلمة زملكاوي أحسن من أي منصب بالنسبة لي، واللي بيحب الكيان بجد، يحط مصلحة الزمالك قبل مصلحته #الزمالك_اولاً_واخيراً"
من جانبه، رد رئيس مجلس إدارة نادي الزمالك، على الهجوم الذي تعرض له بالأمس.
وقال مرتضى، في تصريحات صحفية: "ميدو أكبر خطأ ارتكبته في حياتي، هو محتاج يروح مصحة نفسية للعلاج، وكان باعت لي رسالة على الموبايل قال لي فيها إنت زي أبويا".
وأضاف رئيس القلعة البيضاء: "مش هنزل لمستواك، ورموز النادي هيعملوا مؤتمر صحفي، ويردوا عليك، علشان إنت غلطت في النادي اللي خيره عليك".
وواصل حديثه: "اللاعبون اشتكوا إن ميدو بيسكر، ويسبهم، ومش هرد عليه، هخلي أصغر عامل في النادي هو اللي يرد".
ومن جانب آخر، عقد مرتضى، جلسة صلح مع فاروق جعفر، نجم النادي الأسبق، على هامش مران الفريق مساء اليوم.
وقال جعفر، في تصريحات صحفية: "مرتضى صديق عمري، وما حدث مجرد زوبعة في فنجان، وانتهى الأمر".
وعن أزمة ميدو، قال "ملك النص": "لو ميدو كان عنده دم، كان أعلن استقالته قبل لقاء الأهلي، لما مرتضى اجتمع بلاعبي الزمالك دون وجوده".
