نجم الزمالك يكشف سر اشتباكه مع جماهير الأهلي
كشف باسم مرسي، مهاجم فريق الزمالك ومنتخب مصر، السبب في الأزمة التي وقعت بينه وبين جماهير الأهلي في تونس.
وقال باسم عبر حسابه الشخصي بموقع التواصل الاجتماعي "انستجرام": "توضيح لمشكلة امبارح اللي كل واحد طالع عمال يحلل ويقول كلام على مزاجه، أنا من أول ما لعبت في نادي الزمالك وأنا بتشتم بوالدي ووالدتي وبيتقال عليا كل حاجة ممكن تتقال".
وأضاف: "قالوا عليا تنك مغرور ده عايشها على الناس، بيزعق وبيتنرفز على اللاعيبة بيشتم زمايله في الفريق، عايز كل كورة تتباصي ليه، عايز هو بس اللي يجيب جول، ده بيروح للحلاق أكتر مابيدخل الحمام، كل حاجة بعملها شاغلة الناس.. أجيب جول ده بقى تنك ومغرور مجبش جول ده مستواه بقى وحش ومبقاش زي الأول.. أطول شعري مش عاجب، أقصره مش عاجب.. كل يوم أتصور مع الناس ومش عاجب، ويوم ماكون تعبان من التمرين ومش قادر أتصور علشان بيبقى ورايا التزامات تانية، أبقى تنك ومغرور ده أنا بقيت أخاف أقول لحد سلام عليكم، ليقولك باسم اتجنن ماشي يقول للناس سلام عليكم".
وتابع مرسي: "عارف إني مش هعرف أرضي كل الناس، علشان لو رضيت كل الناس هبقى منافق، كل ده ولا أثر ولا هيأثر فيا علشان أنا عارف طريقي كويس، وعمري ماعملت ولا هعمل مشكلة بسبب التفاهات دي، وعارف إن ضريبة إني بلعب تحت اسم كيان وجمهور كبير هو نادي الزمالك اللي علشانه بجد ممكن أعمل أي حاجة".
واختتم: "إنما توصل إن النادي اللي بلعب وبموت نفسي علشانه يتهان، وأسمعها بوداني أكتر من مرة ومردش وأجيب حقه من اللي غلط فيه، أبقى مش راجل.. اللي عايز يغلط فيا براحته مش هرد عليه.. بس نادي الزمالك خط أحمر، ولما بنقول ربك وطنك ثم الزمالك دي مش كلمة ولا شعار بنقولوا وخلاص، ده شعوره حسينه ومصدقينه بجد".
