حكاية كل يوم

غادة عبد العال

في يوم من الأيام

باقولك إيه ؟ .. ما تسيبي الشغل ده ! .. إنتي يعني غاوية بهدلة ؟ *

بس أنا خايفة أزهق يا حبيبي *

حد يزهق مع جوزه حبيبه ؟ .. طالما هيبقى عندنا وقت براحتنا هتبقى حياتنا كلها خروج و فسح *

خرجني *

مش فاضي *

خرجني *

أنا راجع من الشغل تعبان *

خرجني *

يا حبيبتي احنا في وسط الأسبوع .. هاخرجك يوم الجمعة ان شاء الله *

…

: يوم الجمعة

خرجني*

يا ستي يعني يوم الأجازة الوحيد اللي في الأسبوع مش من حقي أرتاح فيه كمان ؟ ؛ خروج إيه اللي بيتخرج يوم الجمعة ده كمان ؟

….

يوم آخر

شفت يا حبيبي المسلسل التركي ده ؟ . فظيع .. هو و هي بيحبوا بعض و الظروف كلها ضدهم ..طول النهار و

أنا باعيط جنبهم .. اللي حصل بأه يا سيدي

(يقاطعها)

تركي إيه و سوري إيه ؟ .. هو ده اللي انتي فالحة فيه أصلا .. القاعدة طول النهار قدام التليفزيون .. يا بنتي اخرجي شوفي الدنيا بره فيها إيه

ما انت مش بترضى تخرجني * !

ما تخرجي لوحدك هو انتي صغيرة ؟ *

….

يوم آخر

رايحة فين ؟ *

خارجة *

لوحدك ؟ لأ طبعا .. إنتي ناسية إنك متجوزة راجل و الا إيه ؟ *

إنت مش قلتلي أخرج و أشوف الدنيا ؟ *

يا ستي أقصد معنويا .. ممكن تخرجي و انتي في مكانك على فكرة *

إزاي يعني ؟!! *

إقري كتاب ! *

….

يوم آخر

يأتي جريا من خارج البيت

حبيبتي الأكل جاهز ؟*

لسه يا بيبي معلش أصل كنت باقرا كتاب حلو *

كتاب إيه و زفت إيه ؟ .. ده استهتار .. يعني الكتاب أهم و الا حلة المحشي اللي ع النار ؟ *

!!! *

…..

مال شكلك زهقان كده ؟ *

من يوم ما بطلت قراية و فرجة ع التليفزيون مش لاقية حاجة أعملها *

ما تجربي تتصاحبي على حد من الجيران ؟ *

…

باقولك إيه ؟ .. أنا مش باحب موضوع الاختلاط بالجيران ده .. طالما كل شوية هتقعدي تقوليلي دي قالت و دي عملت .. مافيش دماغ للكلام ده .. ما تكلميش حد من الجيران تاني .. و يا حبذا لو تحافظي على هدوء البيت شوية .. بيجيلي صداع

…

حبيبتي أنا جيت *

… *

أنا جيت مش هتردي عليا ؟ *

...*

مش معقول كده على فكرة .. المفروض إني متجوز واحدة ست مش حيطة *

….

ع القهوة

زهقت منها يا وليد .. طول النهار قاعدة زي الصنم كده و ما بتعملش حاجة *

يا عم هم الستات كلهم كده .. في الأول يبقى لطاف و بعد كده بيبقوا مملين ملل السنين .. أقولك .. إتجوز عليها*

لا يا أخي لأ ما يصحش *

… *

بس تصدق … فكرة برضه *