محمد عادل إمام يدشن حملة ضد قرصنة الأفلام
دشن النجم المصري محمد إمام، حملة تحت عنوان "معًا ضد قرصنة الأفلام"، على موقع التواصل الاجتماعي "فيسبوك"، لمحاربة هذه الظاهرة.
ونشر إمام، عبر صفحته الرسمية على "فيسبوك"، صورة لأحد المواقع، التي سرقت فيلم "كنغر حبنا"، معلقًا: "ليه في عقلية بتفكر بالطريقة دي !؟.
وأضاف: "ليه في ناس مركزة في موضوع أنها تسرق الأفلام ومجهود ناس تانية، وتنزلها على النت، رغم إن القانون بيمنع ده !؟.. بجد بيستفيدوا إيه !؟".
وتابع النجم الشاب: "على فكرة إحنا كل حياتنا وطاقتنا ومجهودنا رايحين في إن إحنا نعمل حاجات تبسطكم، وتستمتعوا بيها".
وأردف: "الصناعة دي فاتحة بيوت ناس كتيرة جداً، الفيلم الواحد بيشتغل فيه حوالي من ٥٠٠ لـ٧٠٠ شخص، ده غير الضرائب الكتيرة اللي بتدخل للدولة من ورا أي عمل سينمائي، وكمان فلوس تصاريح التصوير في أي مكان في البلد، غير النقابات".
وأوضح نجل الفنان الكبير الزعيم عادل إمام "صناعة السينما من أهم مصادر الدخل القومي للبلد، والوحيدة اللي واقفة على رجليها، رغم ظروف البلد الاقتصادية..ومن غير أي دعم من الدولة نفسها!!".
واستطرد: "الفيلم الناجح مش المنتج بس والسينمات اللي بيكسبوا منه، لأ، ده كمان المحلات ومطاعم الأكل اللي جنب السينمات، والمواصلات و التكاسي اللي بتوصل الناس للسينما، وناس تانية كتير بتسترزق بسبب فيلم، نجاح الأفلام بيبقى حالة عامة بتعم على الكل، أرجوكم ماتبوظوش الصناعة دي كمان".
واختتم حديثه قائلًا: "ملحوطة أخيرة ..المتعة في مشاهدة الفيلم بتبقى مع صحابك أو أهلك أو حبيبتك في قاعة السينما، وتخرجوا بعدها تتفسحوا، مش لوحدك في أوضتك بشاشة صغيرة ونسخة وحشة كمان.. بس كده".
